Lalaki gibuwagan, midunggab sa uyab tungod sa kasuko nga dili na kini makig-uli niya atubangan sa konsehal nga mihusay nila

ANAA karon sa ospital si Clavel Capistrano, 21 anyos, taga Isla Verde, Bolinawan, Carcar City human nakaangkon og mga samad dinunggaban sa dihang gidunggab sa iyang ex-boyfriend nga si Luis Christian Semblante, 21, taga Sitio Lagang, Bolinawan, Carcar City.

Nahitabo kini mismo sulod sa barangay hall sa Bolinawan alas 3 kagahapon sa hapon (January 6, 2021) sa dihang nag-abot ang duha.

Giingong nidangop sa barangay si Capistrano kay nagsige og padala og dili maayong mensahe si Semblante human niya gibuwagan.

Sigon sa report sa kapolisan, sige’g away ang manag-uyab, ug kay dili na sila magkasinabot, nakahukom si Capistrano nga makigbuwag.

Apan sa text ug chat, giingong nanghulga na si Semblante kay gusto gyud magbalik sila.

Gihusay ang mag-uyab kagahapon pinaagi ni Konsehal Aristelles Paninsoro didto sulod sa treasurer’s office sa barangay hall.

Atol sa hearing, niinsistir gyud si Capistrano nga makigbuwag.

Sa iyang kasuko, mibunot si Semblante og kutsilyo ug gidunggab makadaghan ka higayon si Capistrano.

Giingong nakuratan ang tanang mga tawo sulod sa barangay hall apil ang mga tanod nga kompyansa kay giilang buotan sa ilang dapit ang lalaki.

Wa mosibat si Semblante ug nitahan ra dayon sa konsehal ug sa tanod.

Giingong naglingkod ug naghinuktok ra si Semblante pag-abot sa mga polis.

Kasong frustrated homicide ang atubangon ni Semblante.